مش هيدا هو الحبّ؟

عم ضيّع حروفي كل ما إجي إكتب عنك.. يا عم ضيّعا عن جدّ، يا عم لاقي فوق الحروف، أحرف و ضيع فيا.. ضيع بين الحرف اللي بيشبهك و الحرف اللي بدي قدّملك يا.. ضيع بين الحرف الناعم البريء و الحرف المجنون الوحش.. ضيع بين براءة الحبّ و صراحة جنون القلب و فكّر مليون مرّة أيّ حروف رح تخلّيك تتكمّش فيا لَ الآخر؟ أيّ حروف رح يهمَّك تقرا؟.. أيّ حروف رح ..تعلْقَك بِ حبال الهوى؟.. و كلّ حرف مستعد إذا ما تعلّقت في، يشنق حالو بِ حبال هواك
..عم ضيّع حروفي كل ما إجي إكتبك غنيّة، شعر، نثر
و ما بلاقيك غير صورة مرسومي ع وراقي، بِ أحرف حبّ، قدّيش كتبت قبلا، ما بِ حياتي عرِفتا و ما بِ حياتا كانت من ..إختصاصي
مش هيدا هو الحبّ؟ اللي بتلاقي كل ما تفكّر إنك مضَيَّعو، و اللي بتخاف ضَيّعو لما تلاقي؟.. يمكن ما ضيّعت حروفي.. يمكن ..راحت تنبِّش عليك إنت و معي، من خوفا ضيّعك عن جدّ.. و بِ غيابك، يبطلّ الحبّ بِ وراقي يلاقيك

Simply thinking through my fingers. Follow me on instagram @3alsaket_khawatir

Leave a Reply

Your email address will not be published. Required fields are marked *