..لمّا يطلع كلّ شي كذب

كيف تَ صار فينا هيك؟ كنّا كتير قراب، كنّا ما منتفارق، مدري أنا هيك فكّرت..
كنّا نحكي بعض كلّ يوم و نشوف بعض كلّ يوم و إذا ما تحاكينا نتعاتب بِ حبّ.. مدري أنا هيك فكّرت..
كنّا إذا نحكى ع حدا منّا بِ غيابو، ندافع عنو بِ عمى.. ندافع بِ ثقة إنو منعرف بعض منيح.. مدري أنا هيك فكّرت..
كنّا نتسلّى سوا، و ننطر ضهراتنا مناطرا، عارفين إنو مع بعض رح نغيّر جوّ و ما في شي رح يشدنا نزول.. مدري أنا هيك فكّرت..
كنّا نفهم ع بعض بلا جميلة الحكي و النظرات.. كنّا لما حدا منّا ينوجع، ينوجع التاني معو.. كنّا إذا حدا منّا عايش أسى، التاني يعيشو معو..

 مدري أنا هيك فكّرت..
كنّا رح نكفّي سوا عطول.. إنت! إنت بِ لسانك مرّة قلتلي هيك! مدري أنا سمعت غلط.. مدري إنت هيك فكّرت..
كنّا نخاف ع بعض، ع زعلنا و فرحنا.. كنّا نعتبر نجاح كلّ واحد منّا نجاحنا تنَيناتنا.. كنّا نتشارك اللقمة بلا ما نتقاسَما.. كنّا سوا ع الحلوة
 و المُرّة.. مدري أنا هيك كنت، مدري أنا هيك تمنّيتَك تكون.. مدري أنا ما غلطت، إلاّ لما هيك فكّرت..

Simply thinking through my fingers. Follow me on instagram @3alsaket_khawatir

Leave a Reply

Your email address will not be published. Required fields are marked *