..فيّ

ليش بِتحبّ تِحوّل الناس لَ مرحلة؟.. لَ ذكرة؟.. ليش بدّك تكِبني بالماضي؟.. وأنا بدّي حولَك لَ بسمة تدوم العمر ع شفافي وما تِدبل فرحتا.. فيّ عبّرلك قديش شتقتِلَّك بسّ بعرف إنُّ ما رح تِفرق معك، فَ ما بَعمِلا.. فيّ خَلّي إحساسي كلما إطلَّع بِ عيونَك يسكن فيا.. بسّ بعرف إنَّك رح تِغمِّضا، فَ ما بَعمِلا.. فيّ قسّم حالي لَ١٠٠ قطعة ووَزِّعا ع طريقك بِ كلّ الميلات تَ تِنتِبهلي.. بسّ بعرف إنَّك رح تِفشخ فوقا ورح إنزف أكتر، فَ ما بَعمِلا.. فيّ روح لَ عندك وإحكيك وإفرح فيك.. بسّ بعرف إنَّك رح تِتحجج تَ ما تِفتَح الباب.. فَ ما بَعمِلا.. فيّ إفتَحلك قلبي وقلّك ليش بعرف أهميّة الوقت.. بسّ بعرف إنُّ ما رح يهِمَّك تِسمَع وبِراضي صوتي بِ دموعي.. وما بَعمِلا.. فيّ أعمِل لِ ما بِينعمَل.. وإحكي لِ ما بينحكا.. وإكتب لِ ما بِينكتَب.. بسّ ما فيّ خلّيك تِحبّني.. ما بِتِنعمَل!..

Simply thinking through my fingers. Follow me on instagram @3alsaket_khawatir

Leave a Reply

Your email address will not be published. Required fields are marked *