بتِسمَح؟


شو بحبّ ضحكتك.. بتِسمَحلي بوسا؟
شو بحبّ عيونك.. بتِسمَحلي غازلا؟
شو بحبّ صوتك.. إذا بتِسمَح، سمَّعني بعد..
شو بحب وجّك.. شو بضيع في، وقت اللي بجرّب لحّق حافظ بِ ذاكرتي، ع كلّ تفصيل منّو.. بتِسمَحلي، إسرق تفاصيلك سرقة، و إرجع كوّنا ع وراقي؟ إرسمك بِ كلمة حبّ، بِ حروف ما بتنتهي؟ غازلك بِ لون القلم اللي عم بكتب في، و بِ خطّي؟ ضمّ الرسمة، ضمّ الكلمة، و شمّك كلما ضمّا؟
بتِسمَحلي حبَّك ع طريقتي، متل ما بتستحقّ؟
بتِسمَحلي حبَّك متل ما بستاهل حبّ؟
بتِسمَحلي غازلك لَ يموت الغزل فقِع غيران منك؟ بتِسمَحلي بوس الخدّ و الشِفّي كلما بوس طرَف من الورقة؟
بتِسمَحلي إتخايلك قبالي كلما تخطر ع بالي كلمة حبّ؟.. بتِسمَحلي غنّيلك أحلى مما بقدر؟ و غازلك بِ مستوى أعلى من اللي بملكو؟ و حبّك أكتر مما فيّي؟
بتِسمَح لَ هالأفعال، تصير من بعد ما توافق عليا، شرعيّة؟.. بتِسمَح؟..

Simply thinking through my fingers. Follow me on instagram @3alsaket_khawatir

Leave a Reply

Your email address will not be published. Required fields are marked *